काठमाडौं । फोनपेले 'चेक आउट बाई फोनपे' नामक नयाँ अनलाइन भुक्तानी समाधान सार्वजनिक गरेको छ । मोबाइल एप तथा वेबसाइटमार्फत किनमेल गर्ने ग्राहकहरूका लागि इ-कमर्स भुक्तानीलाई अझ छिटो, सहज र सुविधाजनक बनाउने उद्देश्यले यो समाधान विकास गरिएको बताइएको छ । इ-कमर्सको विस्तारसँगै ग्राहकहरूले भुक्तानी प्रक्रिया पनि किनमेल अनुभवजत्तिकै सहज हुने अपेक्षा गर्न थालेका छन् ।

तर, परम्परागत अनलाइन भुक्तानी प्रक्रियामा ग्राहकले एउटा एपबाट अर्को एपमा जानुपर्ने, पटक–पटक लगइन विवरण प्रविष्ट गर्नुपर्ने, ओटीपी प्रमाणीकरण तथा भुक्तानी पुष्टि हुन पर्खनुपर्ने र पुन: व्यापारीको प्लेटफर्ममा फर्केर खरिद प्रक्रिया पूरा गर्नुपर्ने हुन्छ ।

यी अतिरिक्त चरणहरूले चेकआउट प्रक्रियामा अवरोध सिर्जना गर्दै ढिलाइ, बीचमै रोकिएका कारोबार तथा अधुरा खरिदहरू निम्त्याउने गरेका छन् । करिब ७० प्रतिशत अनलाइन किनमेलका कार्टहरू अन्तिम भुक्तानी नगरी नै छोडिने गरेका छन्, जसको प्रमुख कारणमध्ये लामो वा जटिल चेकआउट प्रक्रिया पनि एक हो ।

भुक्तानी प्रक्रियालाई सरल बनाएर चेक आउट बाई फोनपे ले इ-कमर्सका प्रमुख चुनौतीहरूमध्ये एकलाई समाधान गर्ने तथा व्यापारीहरूलाई रूपान्तरण दर र ग्राहक सन्तुष्टि बढाउन सहयोग गर्ने लक्ष्य राखेको छ ।

कम्पनीका अनुसार चेक आउट बाई फोनपे मार्फत ग्राहकहरूले व्यापारीको चेकआउट प्रक्रियामै सहज रूपमा भुक्तानी गर्न सक्नेछन्, जसले अनावश्यक चरणहरू हटाई अनलाइन भुक्तानीलाई अझ छिटो र सुविधाजनक बनाउँछ ।

साथै, यसले व्यापारीहरूलाई चेकआउट प्रक्रियामा हुने अवरोध घटाउन, सफल भुक्तानीको दर बढाउन तथा ग्राहकलाई अझ उत्कृष्ट अनुभव प्रदान गर्न मद्दत गर्दछ ।

हाल चेक आउट बाई फोनपे कृषि विकास बैंक, सिटिजन्स बैंक इन्टरनेसनल, गरिमा विकास बैंक, कुमारी विकास बैंक, लक्ष्मी सनराइज बैंक, मञ्जुश्री फाइनान्स, मुक्तिनाथ विकास बैंक, नबिल बैंक, प्रभु बैंक, राष्ट्रिय वाणिज्य बैंक (आरबीबी) र सानिमा बैंकसहित ११ वटा वित्तीय संस्थाका मोबाइल बैंकिङ एपहरू मार्फत उपलब्ध छ । 

आगामी महिनाहरूमा थप बैंक, वित्तीय संस्था तथा व्यापारी प्लेटफर्महरूलाई पनि यस सेवामा आबद्ध गरिनेछ । यस अवसरमा फोनपेका प्रमुख कार्यकारी अधिकृत दिवस कुमारले भने, 'इ–कमर्सको विस्तारसँगै भुक्तानी प्रक्रिया पनि किनमेल अनुभवजत्तिकै सहज हुनुपर्छ । चेक आउट बाई फोनपे अनलाइन भुक्तानीमा हुने झन्झट हटाउन तयार गरिएको हो, जसले ग्राहकका लागि कारोबारलाई अझ छिटो र सहज बनाउनुका साथै व्यापारीहरूलाई उत्कृष्ट चेकआउट अनुभव प्रदान गर्न सहयोग गर्छ । छिटो डेलिभरीको पहिचान बनाएको फास्टोसँग यो समाधान सुरु गर्न पाउँदा हामी खुसी छौं, किनकि यसको अवधारणा पनि हाम्रो छिटो र सहज चेकआउट अनुभव प्रदान गर्ने लक्ष्यसँग मेल खान्छ ।'

पहिलो मर्चेन्ट एकीकरणका रूपमा चेक आउट बाई फोनपे अब फास्टो मा उपलब्ध छ, जसले ग्राहकहरूलाई अनलाइन अर्डर गर्दा अझ छिटो र सहज भुक्तानी अनुभव प्रदान गर्नेछ । कम्पनीका अनुसार अब ग्राहकहरूले चेकआउट प्रक्रियामै चेक आउट बाई फोनपे मार्फत सिधै भुक्तानी गर्न सक्नेछन्, जसले अनावश्यक अवरोध हटाई अर्डर गर्ने प्रक्रियालाई पहिलेभन्दा अझ छिटो बनाउनेछ ।

यस सेवाको सुरुवातको अवसरमा फोनपेले फास्टो सँगको सहकार्यमा 'ह्वाट द फास्ट!-फटाफट अर्डर फटाफट चेकआउट' नामक विशेष उपभोक्ता अभियान सञ्चालन गरेको छ । जुलाई ७ देखि जुलाई १३, २०२६ सम्म सञ्चालन हुने यस अभियानअन्तर्गत फास्टो मार्फत अर्डर गरी चेक आउट बाई फोनपे प्रयोग गरेर भुक्तानी गर्ने ग्राहकहरूले २० प्रतिशत क्यासब्याक (अधिकतम १ हजार रूपैयाँसम्म) प्राप्त गर्न सक्नेछन् ।

यस अभियानले ग्राहकहरूलाई फोनपेको नयाँ भुक्तानी समाधानको छिटो र सहज अनुभवसँगै आकर्षक क्यासब्याकको लाभ लिन प्रोत्साहित गर्नेछ । चेक आउट बाई फोनपेको सुरुवातले सुरक्षित, नवीन तथा ग्राहक–केन्द्रित भुक्तानी समाधानमार्फत नेपालको डिजिटल भुक्तानी प्रणालीलाई अझ सुदृढ बनाउने फोनपेको अभियानमा अर्को महत्वपूर्ण उपलब्धि थपेको छ ।

आगामी दिनहरूमा यो सेवा थप बैंक, व्यापारी तथा डिजिटल प्लेटफर्महरूमा विस्तार हुँदै जाँदा अझ धेरै ग्राहकहरूले छिटो, सरल र सहज अनलाइन भुक्तानी अनुभव लिन सक्ने कम्पनीको भनाइ छ ।